الخبر -24: منير لصفر
في سابقة ما كان حتى شي حد يتوقعها، وصل ثمن أكناري (التين الشوكي) داخل أحد الأسواق الممتازة إلى 119 درهم!
نعم، ماشي خطأ مطبعي… مية وتسعتاش درهم 👀
الفاكهة اللي كنا كنشريوها قدام الديور بـ2 دراهم للكيلو، وكنسمعو صوت البائع كيغوت: “أكناري أكنارييييي !”، ولات اليوم كتتباع بحال إلى جاية مستوردة من كوكب آخر!
واش ولى أكناري “نسخة بريميوم”؟
ولا يمكن دارو ليه “تغليف ذهبي” وضافو ليه شهادة الجودة العالمية؟ 🤔
شي وحدين قالو يمكن هاد الثمن فيه:
ثمن التقشير 😅
ثمن التبريد 🧊
وثمن “الهيبة” ديال السوبرمارشي ✨
المثير أن أكناري كان ديما رمز البساطة والفاكهة الشعبية، ولى اليوم فات مستوى لائحة “الفواكه الراقية” أكثر من الأفوكادو المستورد والتوت الأزرق!
باقي غير نشوفوه قريباً فـقائمة الهدايا الفاخرة فالأعراس 😄
🔸 واش رأيكم؟
🔸 واش غادي تشريو أكناري بـ119 درهم ولا ترجّعو لأيام “الميزان والسطولة”؟